Mondu mortu in "Acula marina" da Tchekhov

Publié le par U Spargugliatu

Ombre antìche è veneràbile chì ariavulate stu lavu per sta notte, addurmintate vi, per fà ci sunnià à cio chì serà, da quì à dui centu mill’anni.

 

Omi, leoni, altagne è pò pernice, cervi à corne, oche, ragni, pesci silenziosi campendu in u turchinu, astìrie, è pò tuttu cio ch’ùn sì pò vede à ochju nudu, ogni vita, via, ogni vita, ogni vita s’hè spenta, dopu adempiutu a so trista sorte… Dipoi millaghje di sèculi, ùn porta più nunda di vivu a terra, mentre chì sta corcia luna accende a so lampana in vanu. Ùn fermanu più, in i prati, cigogne svegliendu si, lampendu u so stridu à u celu, è ùn si sente più u rimore di e santalucie in i tigliulaghji. Tuttu, oramai, hè fretu… fretu… fretu… fretu… oghje, u mondu hè diventatu un disertu… un disertu… un disertu… Mi vene u trèmulu di spaventu è d’affettu.

Cio chì firmava di i vivi hè per u sempre vultatu in pulvina, è l’eternu ne hà fattu, sionti à estri soii, petre, acqua, è nìvuli. Anima soie si sò ammuchjate in una sola ; l’anima universale ; cio ch’o sò eiu… eiu.

In mè, campanu e mente di Sambucucciu è di Cesaru, di Shakespeare è di Paoli, incù quella di l’ultima mignatta, dinù. In mè, a cuscenza umana hè vultata à bullighjà si incù u stintu animale. In mè, campa ogni ricordu di cio chì fù, ogni pinseru. In mè si rinviviscenu ogni campà, ogni vita, da a più chjuca à a più grande.

Sò sola. Una volta à sèculu, s’apre a mio bocca, per fà ribumbà a mio voce cun tristezza in u disertu di sta disulazione, chjamu, è nimu ùn risponde. Mai. Mancu voi, o tinti luminelli, ùn mi sentite mancu. Sò e pàdule immerzendu chì vi figliolanu, ogni ghjornu, è fin’à l’alba, vugulate senza pensà, di vulintà spruvisti, è senza manc’un fiatu di vita… Temendu ch’ella vi sia resa l’esistenza, Satanassu, u genitore di l’eterna matèrie, urdina in voi, à ogni stonde, e vostre mulècule, d’una manera nova, per fà chì u scambiamentu sia sempiternu. Solu ferma l’anima in l’universu sanu ab’eternu è immutèvule.

Tale un prighjuneru lampatu in fondu d’un pozzu prufondu è viotu, ùn possu sapè nè quale sò, ne u mio avvene. Èppuru, m’anu svelatu ch’e in quessa lotta, chjuccuta è crudela contr’à quellu diàvulu, maestru di e forze di a materia, vinceraghju. Tandu a robba è l’anima s’addunisceranu in un armunia divina, è u regnu di a vuluntà universale principierà. Quessa accaderà, à bastanza tardu, dopu à tanti millinarii di millinarii, quandu chì a luna, è ancu u luminosu Sirius, è pò a terra dinù, cascheranu pocu à pocu in pulvina. Ma fin’à tandu, serà u regnu di l’orrore, di l’orrore.

Hè Satanassu u mio nemicu pudente, chì s’avvicina. Vecu i so ochji purpurei, spavintosi…

 

Publié dans Adattazione

Commenter cet article