Puesia tistamentu di Bobby Sands

Ci hè una cosa in ogni core umanu

A voli cunosce o amicu ?

Chì hà pattutu tanti colpi dipoi l’iniziu

Ma chì firmerà fin’à l’ultimu.

Sbucciata prima chì u tempu fussi chjamatu

Hà presu fiatu è altezza

Strappatu tante catene

D’una cultellata spietata.

Dipoi i primi tempi

Hà incesu tante fiare quandu focu ùn ci era

Esaltendu l’anime di l’omi

Rinfurzendu i cori fatti di piombu.

Hà pientu assai accant’à Babilonia

Lampendu un stridu d’agunia è di zerga

Quandu tutti l’omini fubbini persi

S’hè dissanguinata nant’à a Croce.

Da a bestia, da a spada

Morse in Roma Via Appiana

Vestuta di sfida è di crudeltà, cun Spartacù

Quandu era chjamata à a morte.

Hà marchjatu accant’à i puvaràccii

S’hè sulcata in i so sguardi

Per rinvivisce fin’à a morte

Spavintendu i Rè è i Sgiò.

Hà surrisu carca di niscentrìa

Di fronte à i cunquistatori

Sottumessa è senza accorta

Di u putere fatale di l’oru.

Schjattò in i carrughji parigini

Per assaltà a vechj Bastiglia

Per arruvinà di i so passi

U capu di tanti sarpi.

Si n’hè morta di sangue nant’à e piane di Buffalo

Si n’hè morta di fame sott’à a luna è a pioce

Fù sipoltu u so core à Wounded Knee

Aspettendu u ghjornu di a so rinascita.

Accaliata, hà mughjatu a so rabbia

Vicinu à i lachi di Kerry

S’hè spenta fiera, carca à sfida

Mentre ch’elli a tumbavanu cun friddura.

Campa in ogni luce di speme

Senza farri ne fruntere

Hà crescitu in i cori rossi neri è bianchi

In ogni sterpa umana.

Riposa in ogni eroe mortu

Luce in l’ochji di i tirani

Più alta ch’è e cime e più alte

Strappa u celu più ch’è a saetta

SCHJARISCE I MURI DI STA CÀRCIARA

A so voce hè una tunizata

Sta cosa hè u sintimu fermu o amicu

Chì ti face dì "ÙN MI SBAGLIU".